भोपाळ : पुन्हा एकदा कोरोनाने डोके वर काढल्याने कोरोनाबाधित (Coronavirus) रुग्णांच्या संख्येत झपाट्याने वाढ होत आहे आणि प्रशासनाने पुन्हा एकदा लोकांना जाणीव व्हावी म्हणून कडक कारवाई सुरू केली आहे . दरम्यान एक धक्कादायक घटना मध्य प्रदेशातातील इंदूरमध्ये समोर आली आहे . मास्क न घातलेल्या एका व्यक्तीला पोलिसांनी तुफान मारहाण केल्याचा व्हिडीओ व्हायरल झाला आहे. मध्य प्रदेशातील इंदूरमध्ये मास्क योग्य पद्धतीनं परिधान केलं नाही म्हणून एका व्यक्तीला दोन पोलीस कर्मचाऱ्यांकडून रस्त्यावरच बेदम मारहाण करणात आली .

मिळालेल्या माहितीनुसार, इंदूर शहरात मंगळवारी करोनाविरुद्ध तपासणी मोहीम सुरू होती. याच दरम्यान एका ३५ वर्षीय व्यक्तीचा मास्क नाकावरून खाली घसरलेला दिसल्यानंतर दोन पोलीस कर्मचाऱ्यांनी त्याला रोखलं.फिरोज गांधी नगरात राहणाऱ्या या 35 वर्षाच्या व्यक्तीचे नाव कृष्णा कुंजीर आहे. कृष्णा याने सांगितले की तो रिक्षा चालवतो. मंगळवारी आपल्या वडिलांना डबा देण्यासाठी हॉस्पिटलमध्ये जात होता. त्याच्या तोंडावर मास्क होता पण तो नाकाच्या थोडा खाली गेला होता.त्यामुळे पोलिसांनी अडवले आणि पोलीस ठाण्यात सोबत चल असे सांगितले. मात्र त्याने नकार दिल्यावर दोघा पोलिसांनी त्याला प्रचंड चोपले. त्याचा व्हिडीओ सोशल मीडियावर व्हायरल झाला आहे. तसेच कुटुंबातील महिलांना देखील मारहाण केली. अधिक पोलीस बल मागवत त्यांना पोलीस ठाण्यात नेले. कृष्णाच्या मुलाने त्यांना वारंवार विनंती केली मात्र त्यांनी काही ऐकले नाही.

या दोन पोलीस कर्मचाऱ्यांची नावं कमल प्रजापत आणि धर्मेंद्र जट असल्याचं समजतंय. या घटनेचा व्हिडिओ सोशल मीडियातून व्हायरल झाल्यानंतर दोन्ही कर्मचाऱ्यांना निलंबित करण्यात आले आहे. संबंधित व्यक्तीनं पोलीस कॉन्स्टेबलची कॉलर पकडल्यानंतर आणि त्यांना शिवीगाळ केल्यानंतर त्यांनी मारहाण केल्याचा दावा, एका पोलीस अधिकाऱ्यानं केला असून पोलिसांची प्रतिमा मलिन करण्यासाठी सोशल मीडियावर शेअर करण्यात आलेल्या फोटो आणि व्हिडिओमध्ये छेडछाड करण्यात आल्याचा दावाही पोलीस अधीक्षक आशुतोष बागरी यांनी केला आहे. दरम्यान महाराष्ट्रात पोलिसांनी दंडुक्याचा वापर न करता दंड आणि समज असा पवित्रा घेतला आहे. पण मध्य प्रदेशमध्ये मात्र अजूनही दंडुक्याचा वापर करण्यात येत आहे

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.