मुंबई: राष्ट्रवादी काँग्रेसचे प्रदेशाध्यक्ष आणि जलसंपदा मंत्री जयंत पाटील यांनी खासदार सुजय विखे पाटील यांनी केलेल्या रेमडेसिवीर इंजेक्शनच्या वादग्रस्त खरेदीच्या मुद्द्यावरून जोरदार टोला हाणला आहे. सुजय विखे यांच्याकडे रेमडेसिवीर आहे असं कळलं असतं तर लोकांना त्यांचा नंबर दिला असता.असे म्हणत जयंत पाटील यांनी विखे पाटील यांच्यावर टीकास्त्र सोडले आहे. सुजय विखे यांचं प्रकरण गंभीर असून औरंगाबाद हायकोर्टाने विखेंवर कारवाईचे आदेश दिले आहेत. लोकप्रतिनीधी जर इंजेक्शन घेऊन बसायला लागले आणि त्याचे वाटप करायला लागले तर वैद्यकीय यंत्रणांना हे इंजेक्शन मिळवण्यात अडथळे येतील, असेही जयंत पाटील यांनी म्हटले आहे.

प्रकरणाची चौकशी करून कारवाई करण्यात यावी

भाजप खासदार डॉ. सुजय विखे पाटील यांनी दिल्लीहून रेमडेसिवीर औषध आणल्या प्रकरणाची चौकशी करून कारवाई करण्यात यावी, अशी मागणी करणारी याचिका नगर जिल्ह्यातील सामाजिक कार्यकर्त्यांनी मुंबई उच्च न्यायालयाच्या औरंगाबाद खंडपीठात दाखल केली आहे. अनेक निर्बंध असतानाही सुजय विखे यांनी हे औषध कुठून आणलं, कुठे वितरित केलं याची चौकशी करून हे काम बेकायदेशीररित्या झाल्याचे आढळून आल्यास साठा जप्त करून कारवाई व्हावी, अशी मागणी याचिकेत करण्यात आली आहे. या याचिकेवर २९ एप्रिल रोजी सुनावणी ठेवण्यात आली आहे. मात्र, तोपर्यंत संबंधित यंत्रणा आपल्या नेहमीच्या पद्धतीप्रमाणे यासंबंधी कारवाई करू शकतील, असे न्यायालयाने म्हटले आहे.

जयंत पाटील यांनी यावेळी भाजपचे प्रदेशाध्यक्ष चंद्रकांत पाटील यांच्यावरही टीका केली. राज्यावर करोनाचे संकट असतानाही पालकमंत्री असलेले हसन मुश्रीफ यांचे अहमदनगर जिल्ह्याकडे लक्ष नाही, असे चंद्रकांत पाटील यांनी म्हटले होते. त्यावर चंद्रकांत पाटील बोलतात त्या सर्वच गोष्टी खऱ्या नसतात, असे जयंत पाटील यांनी पाटील यांना टोला लगावला आहे. हसन मुश्रीफ यांचे अहमदनगर जिल्ह्यांवर व्यवस्थित लक्ष आहे. पुण्यात बसून अहमदनगरची मापे काढण्याचा प्रकार सर्वांनीच बंद करावा, असेही पाटील पुढे म्हणाले.

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.