मुंबई :कोरोनाचा वाढता प्रादुर्भाव लक्षात घेता मागील दीड वर्षांपासून मुंबईची जीवनवाहिनी म्हणून ओळख असलेली लोकलची सेवा सर्वसामान्यांसाठी बंद आहे. मात्र आता कोरोनाची रुग्णसंख्या घटत असल्याने मुंबईकरांचे रोज होणारे हाल थांबवण्यासाठी ज्यांनी लसीचे दोन डोस घेतलेत त्यांच्यासाठी मुंबई लोकल तातडीने सुरू करा, अशी मागणी मुख्यमंत्री महाराष्ट्र नवनिर्माण सेनेचे प्रमुख राज ठाकरे यांनी मुख्यमंत्री उद्धव ठाकरे यांच्याकडे केली आहे. याबाबत राज ठाकरेंनी मुख्यमंत्र्यांना पत्र लिहिले आहे.

कोरोनाचे निर्बंध लागू करताना राज्य सरकारने सर्वसामान्यांसाठी लोकल प्रवासावर बंदी घातली. ही बंदी अद्याप उठवण्यात आलेली नाहीये. नागरिकांकडून ही बंदी हटवण्याची मागणी होत आहे. या मुद्द्याकडे लक्ष वेधत राज ठाकरेंनी मुख्यमंत्री ठाकरे यांना पत्र लिहिले आहे.

राज ठाकरेंनी मुख्यमंत्र्यांना लिहिलेले पत्र…

महोदय,

सर्वसामान्य माणसानं आतापर्यंत खूप सहन केलं आणि त्याची सहन करण्याची क्षमता आता संपत चालली. त्यामुळे आता यापुढे सरकारकडून काही सकारात्मक उपाय केले गेले नाहीत तर कडेलोट होईल. त्या परिस्थितीत माझा पक्ष मुंबईकरांसोबत तर उभा राहीलच; परंतु लोकल प्रवास तातडीने सुरू करण्यासाठी आंदोलन सुरू करेल. त्यामुळे मी माझ्या पक्षातर्फे मुख्यमंत्र्यांना अशी मागणी करतो आहे की, मुंबईकरांचे रोजचे हाल थांबविण्यासाठी मुंबईची लोकल सेवा, निदान ज्यांनी लसीचे दोन डोस घेतले आहेत अशा सर्वांसाठी तरी अत्यंत तातडीनं सुरू केली जावी. विविध प्रकारच्या मोहिमा हातात घेऊन लसीकरण वाढवावे म्हणजे अधिकाधिक लोक लोकल प्रवासाचा लाभ घेऊ शकतील आणि मुंबईचं अर्थचक्र पुन्हा सुरळीत सुरू होईल.

मुंबईकरांचे रोजचे हाल थांबवण्यासाठी मुंबईची लोकल सेवा निदान ज्यांनी लसीचे दोन डोस घेतले आहेत, अशा सर्वांसाठी अत्यंत तातडीनं सुरू करावी, अशी मागणी मुख्यमंत्री श्री. उद्धव ठाकरे यांच्याकडे पत्राद्वारे करत आहे.@CMOMaharashtra pic.twitter.com/UfFGDI8uau

— Raj Thackeray (@RajThackeray) July 22, 2021

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.