मुंबई : कोरोनाच्या दुसर्‍या लाटेचा सामना करत असलेल्या महाराष्ट्रामध्ये 2 दिवसांपूर्वी तौक्ते चक्रीवादळाचा (Cyclone Tauktae) देखील मोठा फटका बसला. गेल्या तीन दिवसांपासून तौक्ते वादळाने गुजरात आणि दीवला झोडपून काढलं आहे. त्यामुळे या परिसराचं मोठं नुकसान झालं आहे. त्यामुळे याच नुकसानाचा आढावा घेण्यासाठी पंतप्रधान नरेंद्र मोदी गुजरात दौऱ्यावर जाणार आहेत. .

यावरून कॉंग्रेस प्रवक्ते सचिन सावंत यांनी मोदींवर टीका केली आहे. ते म्हणाले पंतप्रधान नरेंद्र मोदी ताऊक्ते चक्रीवादळाने झालेल्या नुकसानीची पाहणी करण्यासाठी गुजरात दौऱ्यावर जाणार आहेत. आमच्या कोकणातही प्रचंड नुकसान झाले आहे. मग महाराष्ट्र दौऱ्यावर ते का येत नाहीत? महाराष्ट्राबद्दल एवढा आकस का? असा सवाल त्यांनी केला आहे. ते म्हणाले -असो, मविआ सरकारने कोकणवासीयांच्या पाठीशी ठामपणे उभे राहावे असे आवाहन त्यांनी राज्य सरकारला केले आहे.

पंतप्रधान नरेंद्र मोदी ताऊक्ते चक्रीवादळाने झालेल्या नुकसानीची पाहणी करण्यासाठी गुजरात दौऱ्यावर जाणार आहेत. आमच्या कोकणातही प्रचंड नुकसान झाले आहे. मग महाराष्ट्र दौऱ्यावर ते का येत नाहीत? महाराष्ट्राबद्दल एवढा आकस का? असो, मविआ सरकारने कोकणवासीयांच्या पाठीशी ठामपणे उभे राहावे.

— Sachin Sawant सचिन सावंत (@sachin_inc) May 19, 2021

दरम्यान , चक्रीवादळाचा सिंधुदुर्ग जिल्ह्यातील बागायतीला मोठा फटका बसला आहे. राज्याच्या किनारपट्टी जवळून हे वादळ जात असताना ताशी 114 इतक्या रेकॉर्डब्रेक वेगाचे वारे वाहत असल्याने अनेक झाडांचे , घरांचे मोठे नुकसान झाले आहे. 172 गावांमधील 1,059 शेतकऱ्यांच्या 3,375 हेक्टर क्षेत्रावरच्या बागेचं नुकसान झाल्याचा प्राथमिक अंदाज आहे. आंबा, काजू, नारळ, सुपारी, कोकम आणि केळी पिकांचं मोठं नुकसान झालं अशी माहिती कृषी अधिक्षकांनी दिली आहे.तर कोकणात चक्रीवादळानंतर अनेक गावामध्ये बत्ती गूल होती. तर वीजेचे खांब, झाडं कोलमडून पडल्याने अनेकांचे हाल झाले आहेत.

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.