मुंबई : महानगरपालिकेने कोरोना रुग्णवाढ होत असताना पंचतारांकित हॉटेल्सचा वापर करायला सुरूवात केली आहे. त्यासाठी मुंबई महानगरपालिकेने दोन पंचतारांकित हॉटेलच्या वापराला मंजूरी देखील दिली आहे. त्यामुळे कोविडग्रस्त रुग्णांसाठी विलगीकरणासाठी बेडची सोय होऊ शकेल.

दरम्यान, आता रुग्णालयांत जागा अपुरी पडू लागल्याने मुंबईत दोन पंचतारांकित हॉटेलमध्ये एकूण ४२ खाटांची सोय करण्यात आली आहे. त्यापैकी २२ खाटा मरिन ड्राईव्हच्या इंटर कॉन्टिनेन्टल हॉटेलमध्ये तर २० खाटांची सोय बीकेसीच्या ट्रायडंट हॉटेलमध्ये करण्यात आली आहे. जर रुग्णवाढ अशीच होत राहीली तर येत्या काही काळात मुंबई महानगरपालिका आणखी काही हॉटेल्सना देखील परवानगी देणार आहे.

बीएमसी अधिकाऱ्यांच्या म्हणण्यानुसार, येत्या काही दिवसांत यात आणखी हॉटेल्सही समाविष्ट केली जातील. या ठिकाणी गंभीर लक्षणे नसलेल्या कोरोना रूग्णांवर उपचार केले जातील. याव्यतिरिक्त येत्या आठवड्यात बीएमसीची 2000 बेड वाढवण्याची योजना आहे. यातील काही आयसीयू बेड असतील, तर काही ऑक्सिजन बेड असतील. मुंबईतील रुग्णालयात 98 टक्के आयसीयू आणि व्हेंटिलेटर बेड भरले आहेत.

बीएमसीने जारी केलेल्या परिपत्रकानुसार, रुग्णालये रुग्णांकडून दिवसाचे 4000 रुपये शुल्क घेऊ शकतात. यामध्ये बेड्स आणि फूड चार्जचा समावेश असेल. रुग्णाच्या उपचाराचा खर्च स्वतंत्रपणे भरावा लागेल. एकाच कुटुंबातील दोन जण भरती झाले, तर ट्वीन शेअरिंगचा पर्याय आहे. यासाठी एका दिवसाचे 6 हजार रुपये शुल्क आकारले जातील.

तत्पूर्वी, बृहन्मुंबई महानगरपालिकेचे प्रमुख इक्बालसिंग चहल यांनी सोमवारी म्हटले होते की, सरकारने सीसीसी 2 सुविधा (रुग्णांसाठी कोविड -19 केअर सेंटर) सुरू करण्यासाठी 4 आणि 5 स्टार हॉटेल्सना विनंती केली होती. ही केंद्रे मोठ्या खासगी रुग्णालयांच्या देखरेखीखाली चालविली जातील.

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.