नवी दिल्ली :केंद्र सरकारने पाठवलेली ६,४४१ मॅट्रिक टन डाळ ठाकरे सरकारच्या निष्काळजीपणामुळे गरिबांपर्यंत पोहचलीच नाही असा धक्कादायक खुलासा केंद्रीय मंत्री रावसाहेब दानवे यांनी केला आहे. दानवे म्हणाले की, डाळ महाराष्ट्रात सडून वाया जात आहे, एवढ्या मोठ्या प्रमाणात डाळ खराब होण्यासाठी राज्य सरकारचा निष्काळजीपणा कारणीभूत आहे. ही बाब निदर्शनास येताच केंद्राने ती तातडीने गरिबांना वितरित करण्याचे आदेश दिले आहेत.

कोविड परिस्थितीत देशातील गरिबांना अन्न मिळावे यासाठी केंद्र सरकारने प्रधानमंत्री गरीब कल्याण अन्न योजना ही एप्रिल ते नोव्हेंबर या कालावधीसाठी लागू केली होती. तर एप्रिल आणि मे या कालावधीसाठी आत्मनिर्भर भारत योजना लागू करण्यात आली होती. या योजनांच्या अंतर्गत प्रति लाभार्थी ५ किलो अन्नधान्य आणि १ किलो डाळ देण्यात आली.याचाच एक भाग म्हणून महाराष्ट्रासाठी आत्मनिर्भर भारत योजनेच्या अंतर्गत १,७६६ मॅट्रिक टन डाळ तर प्रधानमंत्री प्रधानमंत्री गरीब कल्याण अन्न योजनेच्या अंतर्गत १,११,३३७ मॅट्रिक टन डाळ महाराष्ट्राला पाठवण्यात आली. पण राज्य सरकारच्या निष्काळजीपणामुळे यापैकी ६,४४१ मॅट्रिक टन डाळ ही अजूनही शिल्लक राहिली आहे. ६ एप्रिल २०२१ रोजी खुद्द राज्य सरकारनेच ही बाब केंद्राला कळवली. त्यावर केंद्र सरकारने १५ एप्रिल २०२१ रोजी ही डाळ तावरीत वितरित करण्यास राज्य सरकारला सांगितले. ग्राहक संरक्षण, अन्न व सार्वजनिक वितरण केंद्रीय राज्यमंत्री रावसाहेब दानवे पाटील यांनी १ मे रोजी ही माहिती दिली.

आत्मनिर्भर भारत योजने अंतर्गत १,७६६ मेट्रिक टन डाळ आणि PMGKAY १ & २ मध्ये महाराष्ट्र राज्याला १,११,३३७ मेट्रिक टन डाळ दिली. अशी एकुन १,१३,०४१ मेट्रिक टन डाळ महाराष्ट्राला दिली होती, परंतु राज्य सरकारच्या निष्काळजीपणामुळे एकुन ६,४४१ मेट्रिक टन इतकी दाळ शिल्लक राहिली. (1/4) pic.twitter.com/1OkyTbP8qw

— Office of Raosaheb Patil Danve (@raosaheboffice) May 1, 2021

यावर प्रतिक्रीया देताना, “डाळीच्या वितरणाची परवानगी दिली असताना इतकी डाळ शिल्लक राहणे हे राज्य सरकारचा निष्काळजीपणा दर्शवते. वितरण न केल्यामुळे राज्यात ठिकठिकाणी ही डाळ सडून वाया जात असल्याची माहिती समोर येत आहे. या नुकसानीस महाराष्ट्र सरकार जबाबदार आहे.” असे रावसाहेब दानवे यांनी म्हटले आहे.

बातम्यांच्या संबंधित सर्व बातम्यांसाठी आम्हाला फेसबुक, ट्विटर, यूट्यूबवर फॉलो करा.